Ұзартылған кузовпен жасалған бұл ерекше спорткардың бағасы $1,25 млн (647 млн теңгеден астам) деп бағалануда, деп хабарлайды Hemmings аукцион үйінің ресми сайты.
Аукционға қойылған Porsche 911 автокөлігінің басты ерекшелігі – қалыптан тыс ұзын дөңгелек базасы. B17 индексімен белгіленген концепт 1969 жылы Porsche компаниясының арнайы тапсырысы бойынша жасалған. Pininfarina дизайнерлері классикалық купенің анағұрлым практикалық нұсқасын жасағысы келген. Осы мақсатта олар артқы бөлігін қайта жасап, шатыр сызығын өзгерткен, алайда модельдің фирмалық белгілерін сақтап қалған.
Көлемдік өзгерістер техникалық сипаттамаларға да әсер еткен. Мәселен, көлік массасы 1100 кг-ға дейін өскен, ал ауырлық орталығы артқы оське қарай ығысқан. Қызықты нәтиже бергенімен, автокөлік өндіруші бұл үлгіні сериялы өндіріске жібермеу туралы шешім қабылдаған. Дегенмен, кейбір шешімдер кейінгі 911 серияларының дамуына әсер еткен.
1972 жылы бұл автомобиль жеке меншікке берілген. 1974 жылдан бастап ол Швециядағы жеке коллекцияның бір бөлігі болған және ешқашан сатылымға шығарылмаған, аукциондарға қатыспаған.
Сондай-ақ, бастапқыда Porsche 911 кузовы қою көк түсті болғаны белгілі, бірақ кейін ол жасыл түске боялған. Қолданылған жылдары бұл прототип 61 мың км-ден сәл артық жол жүрген – бұл көрмелік үлгілер үшін өте сирек жағдай.
Ретро-автомобильдің жағдайы жақсы деп бағалануда: бір рет қана боялғанымен, түпнұсқа бөлшектері сақталған және әлі күнге дейін жүріп тұр. Қазіргі иелері әлеуетті сатып алушылардан ұсыныстар қабылдап жатыр, сонымен қатар айырбастау мүмкіндігін де қарастырып отыр.
Бұған дейін аукционға бірегей Бэтмобиль де қойылған болатын. Warner Bros. лицензиясымен жасалған суперқаһарманның көлігі $260 мыңға (шамамен 134 млн теңге) сатылуы мүмкін.
