Әлемдегі үздік дауыс иесі, қазақстандық әнші Димаш Құдайберген туған күні қарсаңында жаңа бейнебаяны жарыққа шығатынын айтты.
Instagram парақшасында әнші бұл құпияны ашты: бейнебаян оның өз өмірі туралы болмақ.
"Өмір - ақ пен қара алмасқан, бақ пен нала арбасқан, қуаныш пен қайғы таласқан, теңдессіз алып кеме. Айдындағы сұрапыл толқынға да, дауылға да төтеп беруіме түрткі болып жүрген барша тыңдармандарыма туған күнімнің қарсаңында шығатын, алғаш рет әуені мен сөзі жан дүниемді жарып шыққан шығарма. Бұл туынды менің өмірім жайында.
Өмір… Сахна…,"- деп жазды әнші.
Ол өзінің YouTube арнасында жаңа бейнебаянның тұсаукесері 24 мамырда өтетінін хабарлады.
Еске салайық, бір айдан сәл астам уақыт бұрын Димаш Құдайберген жанкүйерлерін жаңа «Together» бейнебаянымен қуантқан болатын.
Айтпақшы, сыншылар атап өткендей, Димаш шығарған әрбір клиптің мағынасы терең. Мәселен, өткен жылдың қыркүйек айында жарыққа шыққан «Бір аспанның хикаясы» атты клипі жанкүйерлер арасында біраз шу шығарды.
Кейін Қытайда өткен жанкүйерлер кездесуінде жас композитор «Бір аспанның хикаясы» бейнебаянының терең мағынасын айтып, соғыс туралы өз ойларымен бөліскен еді.
