ҚР Білім және ғылым министрлігінің Ұлттық тестілеу орталығы ҰБТ-да орташа баллдың төмен болуының себебін түсіндіруге тырысты.
Жыл сайын ҰБТ-ның орташа балы 140 баллдың 70-і шамасында ауытқиды. Қаңтардағы тестілеу қорытындысы бойынша орташа балл небәрі 68 болды. Журналистер брифингте мектеп бітірушілерінің көбі негізгі емтихан кезінде неге жарты балл жинай алмайтынын сұрады.
Ұлттық тестілеу орталығының директоры Болатбек Әбдірәсілов соңғы жылдары талапкерлердің білім сапасының төмендеп бара жатқанын мойындап, мұны 2020 жылғы коронавирустық пандемиямен түсіндірді.
Оның пікірінше, пандемия баяғыда артта қалғанына қарамастан, ҰБТ-ның орташа баллының төмен болуы оның салдары болып табылады.
«Егер соңғы жылдары орташа баллдың төмендеуі байқалса, бұл Ковид кезінде болған мәселелерге байланысты болды. Бұған дейін бірнеше университетте ректор болып қызмет атқардым. Онда біз Ковид кезінде мектепте оқыған талапкерлеріміздің деңгейі төмендеп жатқанын көріп отырмыз. Бұл оқушылардың біліміне кері әсерін тигізді. Бұл ретте әрбір ата-ана мен оқушы өз білімін жетілдіруге мүдделі деп ойлаймын. Дайындыққа өте жақсы мүмкіндік бар», — деді ол.
Естеріңізге сала кетейік, бүгін Қазақстанда 2024 жылғы негізгі ҰБТ еліміздің 14 өңірінде басталды, ол 5 шілдеге дейін жалғасады. Алты өңірде өтініштер әлі қабылдануда. ҰБТ-ға барлығы 181 мың түлек қатысады.
Талапкерлердің 75 пайызы тестілеу үшін қазақ тілін таңдаса, 25 пайызға жуығы орыс тілін таңдаса, 200-ден астам адам ағылшын тілінде тест тапсыруды ұйғарған.
