Жеке әнші ANSAT өзінің дебюттік альбомын “TEATR” деп атады. Альбом атауы әншінің музыкалық жолындағы көпжылдық тәжірибесіне негізделген.
Әнші сахнадағы өнер жолын Juniors және Moonlight топтарында ән айтудан бастаған. Танымалдылыққа ие болғаннан кейін оның өмірінде бір керемет театрлық қойылым іспеттес көптеген қызықты сәттер орын алды. Дәл қазір ANSAT өзін сол театрдағы сүйікті ісінен айырылғандай сезінеді. Сондықтан альбомға осы мағынаға сай – “TEATR” атауы берілді. Туындылар белгілі бір жанрмен шектелмейді: онда поп-рок және инди жанрларынан алынған әндер бар. Сондықтан жаңа әндерді бір бағытта немесе стильде деп айту қиын, дегенмен тыңдарманға жақсы көңіл-күй мен мотивация сыйлайтыны сөзсіз.
Альбомда 5 туынды бар, оның ішінде басты ән ретінде “HIKAYA” таңдалды. Әндерінің тақырыптары ішкі күйзеліс, қайта оралу, берілмеу, махаббат сияқты сезімдерді қамтиды. ANSAT-тың басты шабыт көзі – оның өз өмір тарихы. Әрбір адамның өз жолы және тұлға болып қалыптасу мақсаты бар. Бұл альбом да сол тұлға болып қалыптасу жолындағы шабытпен жазылған.
ANSAT-тың жеке орындаушы ретінде жасаған алдыңғы әндері оның күйзелістен шығуына бағытталған. Ол әндер де өз тыңдармандарын тапты және ANSAT-қа көмектесті. Ал “TEATR” альбомы әншінің музыкалық жолын қайта жаңаша бастауының белгісі және мүлдем басқа көңіл-күймен оралғанын көрсетеді.
"Альбом жасау бастапқыда жоспарланбаған. Алайда, жақындарым мен достарым бұл әндердің альбом болып шығуы керек екенін айтты. Әрине, альбом жасау барысында қорқыныш пен жауапкершілік сезімі болды. Әрбір әнді жазарда оны сапалы орындау жауапкершілігі тұрды. Бұл істе маған досым Еркехан Абдолдаев көмек көрсетті. Шешім қабылданып, альбом дайын болды. Енді тыңдармандар оны тыңдап, өз бағасын бере алады", - деді Аңсат Ділдабай.
Әнші әрбір тыңдарман альбомдағы әндердің атмосферасын, сөздерін сезініп, ішкі эйфорияны бастан кешуін қалайды. Альбом барлық музыкалық платформаларда қолжетімді (Spotify, Apple Music, Yandex Music, ITunes, т.б.), сондай-ақ YouTube желісінде де тыңдауға болады.
Альбом жазылу барысында ANSAT-қа үлкен қолдау көрсеткен Еркехан Абдолдаевпен бірге орындайтын “IISINDI KORPEDEN” атты әні жарық көрді . Еркехан мен ANSAT бұрын Moonlight тобында бірге жұмыс жасағандықтан, коллаб жасау олар үшін қиындық туғызбады. Әнші альбомды шығарғаннан кейін, болашақта да көптеген әндер болатынын атап өтті. Ол дәл қазіргі сәтті сезініп, асықпай болашаққа қадам жасағысы келеді. “TEATR” – бұл ANSAT-тың сахнадағы өмірін бейнелейтін нағыз театрлық қойылым.
Фото: esquire.kz
