Футболшы беделді марапатты сегізінші рет жеңіп алды.
30 қазанда Францияның France Football газеті өткен маусымды марапаттау рәсімін өткізді. Дауыс беру нәтижесі бойынша америкалық «Интер Майами» шабуылшысы Лионель Месси «Алтын доп» жүлдесін алды.
Өткен маусымда аргентиналық ПСЖ сапында Франция 1 лигасында 32 матч өткізіп, 16 гол соғып, 16 нәтижелі пас берді. Сондай-ақ, Месси Чемпиондар лигасының жеті ойынында төрт гол соғып, төрт нәтижелі пас берді.
Сонымен қатар, Лионель Месси Аргентина құрамасы сапында 2022 жылы Катарда өткен әлем чемпионатында жеңіске жетті. Футболшы әлем чемпионатында жеті матч өткізіп, жеті гол соғып, финалда дубль жасап, үш нәтижелі пас берді.
Бұл аргентиналық үшін оның мансабындағы сегізінші жүлде. «Алтын допты» Мессиден артық ешкім алған емес.
Аргентиналық шабуылшы бұл мәртебелі марапатты 2009, 2010, 2011, 2012, 2015, 2019, 2021 және 2023 жылдары алған. Португалиялық Криштиану Роналду 2008, 2013, 2014, 2016 және 2017 жылдары «Алтын доп» иегері атанды. Месси мен Роналдудан бөлек Йохан Кройфф, Мишель Платини және Марко ван Бастен сияқты аты аңызға айналған футболшылар екі реттен астам осы жүлдені жеңіп алды (үш рет).
«Интер Майами» клубының шабуылшысы Лионель Месси өзінің сегізінші «Алтын добын» аты аңызға айналған Диего Марадонаға арнады. Месси марапатты Марадонаның 63-ші туған күнінде алды.
«Менің есімде, бүгін Диегоның туған күні және оны өзі сияқты футболды жақсы көретін көптеген адамдардың алдында құттықтағым келеді. Туған күніңмен, Диего, мен бұл марапатты сенімен бөлісемін», - деп келтіреді жергілікті БАҚ Мессидің сөзін.
