Медет Шаяхметов Instagram Rings 2026 халықаралық сыйлығын алды
Қазақстандық режиссер және клипмейкер Instagram Rings 2026 халықаралық сыйлығының 25 лауреатының қатарына енді
Instagram Rings әлемнің түкпір-түкпіріндегі туындылары түпнұсқалығымен, батыл шығармашылық шешімдерімен және заманауи мәдениетке ықпалымен ерекшеленетін авторларды атап өтеді. Биыл жеңімпаздар тізіміне визуалды жобалары мен музыкалық бейнекліптерімен танымал қазақстандық режиссер Медет Шаяхметов кірді.
Лауреаттарды халықаралық қазылар алқасы таңдады. Оның құрамында рэпер A$AP Rocky, дизайнер Донателла Версаче, музыкант FINNEAS, режиссер Хлоя Чжао және Instagram басшысы Адам Моссери бар. Бағалау кезінде қатысушылардың шығармашылық жетістіктерімен қатар, олардың цифрлық ортада жаңа үрдістер қалыптастыру қабілеті де ескерілді.
25 жеңімпаздың қатарында спорт, музыка және визуалды өнер сияқты түрлі индустрия өкілдері бар. Шаяхметовпен бірге норвегиялық футболшы Эрлинг Холанд пен британдық әнші Little Simz те марапатталды.
Әр лауреат төртжапырақ жоңышқа бейнеленген алтын сақина алады, оны дизайнер Эмили Адамс Боде Оджла жасаған. Марапатты дайындау үшін Ирландияның сирек кездесетін Коннемара мәрмәрі пайдаланылады. Жеңімпаздарға Instagram ішінде арнайы цифрлық мүмкіндіктер де беріледі.
