2028 жылы АҚШ-тың Лос-Анджелес қаласында өтетін Олимпиада және Паралимпиада ойындарының ұйымдастыру комитеті ашылу және жабылу салтанаттарының қайда өтетінін анықтады.
Олимпиада ойындарының ашылу салтанаты алғаш рет бір мезетте екі алаңда өтеді — Лос-Анджелес мемориал колизейінде және Инглвуд қаласындағы стадионда. Лос-Анджелес мемориал колизейі тарихта Олимпиада ойындарын үшінші рет қабылдайтын алғашқы стадион болып қалмақ, ал Инглвудтағы стадион бұл додада алғаш рет қолданылады.
Екі стадионды қатар қолдану шешімі ойындардың кестесіне енгізілген өзгерістермен байланысты: жеңіл атлетика жарыстары бірінші аптада, ал жүзу жарыстары екінші аптада өтеді.
Олимпиаданың жабылу салтанаты Лос-Анджелес мемориал колизейінде өтеді. Бұл рәсім Олимпиада қозғалысының рухын бейнелейтін салтанатты әрі тарихи шара болмақ. Паралимпиада ойындарының ашылу салтанаты Инглвудтағы стадионда, ал жабылуы — Мемориал колизейде өтеді.
Лос-Анджелес-2028 Олимпиадасының ашылу салтанаты 14 шілдеде, ал жабылу салтанаты 30 шілдеде өтеді. Паралимпиада ойындары 23 тамызда басталып, 3 қыркүйекте аяқталады.
