Қазақстан азаматтарына 18 бен 21 жас аралығында онлайн түрде төлем карталарын алу немесе қайта шығару тыйым салынатын болады. Жаңа картаны рәсімдеу үшін банк бөлімшесіне жеке барып өтініш беру қажет. Сондай-ақ, осы жас тобымен қашықтан жұмыс істеуге тыйым салынуы жоспарланып отыр.
14-18 жас аралығындағы жасөспірімдер үшін интернет арқылы жасалатын барлық банктік операцияларды ата-аналары немесе заңды өкілдері растайтын талап енгізіледі.
Жоба авторларының айтуынша, бұл шаралар клиенттерді алаяқтықтан қорғауға бағытталған. Осы бастама аясында банктер клиенттердің биометриялық деректерін, мысалы, фотосуреттер мен бейнемазмұнды, келісім-шарттың аяқталуынан кейін кем дегенде бес жыл бойы сақтау міндетін атқарады.
Банктер қосымша мынадай клиенттер категорияларына назар аударатын болады: бес және одан да көп картаның иелері, тұрақты тұратын жері жоқ резидент еместер, 14-25 жас аралығындағы ресми табысы жоқ азаматтар, сондай-ақ шекаралық аймақтарда карталарды рәсімдейтін тұлғалар. Бұл шаралар қаржылық қылмыстардың алдын алу және бақылауды күшейтуге бағытталған.
Жаңа карта алғысы келетін клиенттер картаның қолданылу мақсатын көрсетуге міндетті болады. Банктер, өз кезегінде, операциялардың мәлімделген мақсатқа сәйкестігін тексеруі керек. Егер сәйкессіздік анықталса, клиентке жоғары деңгейдегі тәуекел тағайындалуы мүмкін.
