2025 жылғы 30 сәуірде Қазақстан Парламентінің Мәжілісі Салық кодексіне түзетулерді екінші оқылымда қабылдады.
Қабылданған түзетулерге сәйкес, қосылған құн салығының (ҚҚС) мөлшерлемесі 12 пайыздан 16 пайызға дейін ұлғайтылады. ҚҚС бойынша міндетті тіркеу шегі — 40 миллион теңге болады. Қазіргі шегі — 78 миллион теңге.
Сондай-ақ, жаңа түзетулер бойынша дәрі-дәрмектер мен медициналық қызметтерге ҚҚС-тың төмендетілген мөлшерлемесі қарастырылған: 2026 жылдан бастап — 5 пайыз, 2027 жылдан бастап — 10 пайыз.
ҚҚС-тан кепілдендірілген тегін медициналық көмек көлемі, міндетті әлеуметтік медициналық сақтандыру, сирек кездесетін (орфандық) және әлеуметтік маңызы бар ауруларды емдеу аясындағы тауарлар мен қызметтер босатылады.
Сонымен қатар, әлеуметтік маңызы бар азық-түлік тауарлары мен отандық басылым кітаптар, сондай-ақ кітаптарды басып шығару қызметтері ҚҚС-тан босатылады. Фермерлерге түсетін салықтық жүктемені де азайту көзделіп отыр.
Бизнес арасындағы операцияларға арнайы салық режимін қолдану кеңейтіледі.
Сонымен бірге, құмар ойын бизнесі мен банктер үшін корпоративтік табыс салығының мөлшерлемесі 25 пайызға дейін көтеріледі. Жеке табыс салығына прогрессивті шкала енгізіледі: жылдық табысы 8500 АЕК-ке дейін немесе 33,5 миллион теңгеге дейінгі жалақыға — 10 пайыз, ал одан асатын табысқа — 15 пайыз.
Алкоголь, темекі, қыздырылатын темекі өнімдері мен энергетикалық сусындарға акциздер кезең-кезеңімен көбейтіледі және жаңа акциздер енгізіледі.
